«Las Vegas Raiders » ամերիկյան ֆուտբոլի թիմի երկրպագուական խմբի՝ Raiderettes-ի ելույթի տեսանյութն անսպասելիորեն վիրուսային տարածում է ստացել՝ հայկական երաժշտության շնորհիվ։ Ամերիկահայ կատակերգու Ջեք Ասադուրյան կրտսերը աղջիկների համաժամանակյա շարժումներն ուղեկցել է հայկական երաժշտական կատարումով՝ տեսանյութը վերածելով զվարճալի ու ինքնատիպ հոլովակի։ Էներգիայով լի խորեոգրաֆիան և հայկական ազգային մեղեդիները տեսանյութը հոկտեմբերի սկզբի ամենաքննարկվող հրապարակումներից են դարձրել, և այն արագորեն տարածվել է սոցիալական ցանցերում։ Թեև Լաս Վեգասի մարզադաշտում հայկական երաժշտություն չի հնչել, Հայաստանի մշակութային հետքը վաղուց առկա է NFL-ի՝ Ֆուտբոլի ազգային լիգայի պատմության մեջ։ Լիգայի առաջին հայազգի խաղացողը համարվում է Միհրան «Մայք» Գուլյանը (1900–1970), որը հանդես է եկել 1920-ական թվականներին և ստացել «Հայ արքայազն» մականունը։ Ամերիկյան ֆուտբոլի ամենահայտնի հայազգի ներկայացուցիչներից է Գարո Եպրեմյանը (1944–2015)՝ «Մայամի Դոլֆինսի» հարվածող խաղացողը, որը երկու անգամ դարձել է Super Bowl-ի հաղթող և իր անունը գրանցել 1972 թվականի՝ առանց պարտության անցկացրած մրցաշրջանի պատմության մեջ։ Սթիվ Ֆերնեսը (1950–2000) հանդես է եկել «Փիթսբուրգ Սթիլերսի» կազմում և նվաճել չեմպիոնական չորս մատանի։ Հայ ներգաղթյալների ժառանգ Դոն Փոլը (1925–2014) փառքի է հասել «Լոս Անջելես Ռեմսի» կազմում և ընդգրկվել Կալիֆոռնիայի համալսարանի՝ Լոս Անջելեսի մասնաճյուղի (UCLA) մարզական փառքի սրահում։ Արա Փարսեղյանը (1923–2017) խաղացել է «Քլիվլենդ Բրաունսում», այնուհետև դարձել «Նոտր Դամ» համալսարանի լեգենդար մարզիչը՝ թիմին երկու անգամ հասցնելով ազգային չեմպիոնության։ Բենջամին Ջեյմս Աղաջանյանը (1919–2018) հանդես է եկել մի շարք ակումբներում, այդ թվում՝ «Ֆիլադելֆիա Իգլսում» և «Նյու Յորք Ջայանթսում», և դարձել լիգայի առաջին հայազգի հարվածող խաղացողներից մեկը։ Այսպիսով, հայկական մշակույթն ու անվանի հայազգի մարզիկների անունները հաստատուն տեղ են զբաղեցնում ամերիկյան ֆուտբոլի պատմության մեջ, իսկ Raiderettes-ի մասնակցությամբ վիրուսային տեսանյութը ևս մեկ անգամ հիշեցրել է NFL-ում հայերի հարուստ ժառանգության մասին։ The post Հայկական հետքը ամերիկյան ֆուտբոլում․ Raiderettes-ի տեսանյութը դարձել է վիրուսային appeared first on Alphanews .