Հոկտեմբերի կեսերին մի քանի օրվա ընթացքում մոտ հազար միգրանտներ Լիբիայից նավակներով հասել են հունական Կրետե կղզի, գրում է Kathimerini-ն։ Տեղական իշխանությունները բախվում են նրանց տեղավորման վայրերի պակասին, իսկ ժամանածների պատմությունները կասկածի տակ են դնում միգրացիոն հոսքը կրճատելու ջանքերի արդյունավետությունը։ Հոկտեմբերի 10–11-ի շաբաթավերջից մինչև երեքշաբթի ուշ երեկո Իերապետրայի առափնյա պահպանության պատասխանատվության գոտու ափերի մոտ հայտնաբերվել է ավելի քան 17 նավակ՝ մոտ հազար մարդով։ Ինը նավ ինքնուրույն հասել է ափ։ Մնացածները նկատվել են ցամաքից տասնյակ ծովային մղոններ հեռու՝ եվրոպական Frontex գործակալության անօդաչուի կամ առափնյա պահպանության ինքնաթիռի օգնությամբ։ Միգրանտներին կղզի են տեղափոխել պարեկային նավերը։ Տարվա սկզբից Կրետե է հասել ավելի քան 19 հազար միգրանտ։ Իերապետրայում նրանց տեղավորել են մունիցիպալ պահեստային համալիրի տարածքում, որտեղ տղամարդիկ, կանայք և երեխաները ստիպված են եղել պատսպարվել բեռնատարներում և աղբատար մեքենաների տակ։ Վերջերս առափնյա պահպանությունը ներկայացուցիչ է ուղարկել լիբիական Բենգազի՝ տեղական իշխանությունների վրա ճնշում գործադրելու և միգրանտների մեկնումը սահմանափակող միջոցների հասնելու համար։ Սակայն ժամանածների պատմությունները վկայում են, թե որքան բարդ է շարունակում մնալ իրավիճակը։ Միգրանտները նշում են, որ Լիբիայում գործում են հանցավոր խմբավորումներ, որոնք առևանգում են մարդկանց, ծեծում նրանց և պահում կալանքի մեջ՝ փրկագին պահանջելով։ «Նրանք կարող են քեզ բռնել հենց փողոցում, ծեծել և փակած պահել, մինչև չվճարես», — պատմել են ժամանածները՝ նկարագրելով լիբիական «մաֆիայի» գործունեությունը։ Կրետեում մարդկանց ընդունելու պայմանների պակասը և Լիբիայում շարունակվող բռնության մասին հաղորդումները բարդացնում են Միջերկրական ծովով միգրացիոն հոսքը կանգնեցնելու փորձերը։