Հռոմի պապ Լևոն XIV-ը թոքերի վիրահատությունից հետո առաջին անգամ հայտնվել է հավատացյալների առջև՝ հանդես գալով կիրակնօրյա ավանդական քարոզով։ Ինչպես ընդունված է, նա երևացել է Սուրբ Պետրոսի հրապարակին նայող Առաքելական պալատի պատուհանից, հայտնում է ՏԱՍՍ-ը։ Քահանայապետը շնորհակալություն է հայտնել Հռոմի Ագոստինո Ջեմելիի անվան հիվանդանոցի բժիշկներին ու բուժանձնակազմին, որտեղ բուժում էր ստանում, ինչպես նաև բոլոր նրանց, ովքեր այս օրերին աղոթել են իր առողջության համար։ Նախօրեին նա դուրս էր գրվել հիվանդանոցից։ «Այժմ աստիճանաբար վերադառնում եմ իմ սովորական գործունեությանը»,- հայտարարել է Լևոն XIV-ը։ Մեկ շաբաթ առաջ՝ կիրակնօրյա քարոզի ժամանակ, 71-ամյա պապը հայտնել էր առաջիկա թոքային վիրահատության մասին։ Նրա մոտ հայտնաբերված փոքր նորագոյացությունը չարորակ էր՝ ադենոկարցինոմա։ Հոկտեմբերի 13-ին այն հեռացվել է թոքի մի մասի հատմամբ։ Բժիշկների խոսքով՝ վիրահատությունը հաջող է անցել, և քահանայապետին հակացուցված չէ ճանապարհորդել։ Հետևաբար, նոյեմբերի սկզբին նախատեսված առաքելական այցը Լատինական Ամերիկայի երկրներ՝ Ուրուգվայ, Արգենտինա և Պերու, պետք է կայանա։