Թեհրանի հայոց թեմի Թեմական խորհրդի ընտրութիւններով սկսւում է ոչ թէ սոսկ կառավարման նոր շրջան, այլ պատասխանատւութեան նոր հանգրւան։ Արդիւնաւէտ գործունէութիւնը պահանջում է նոր եռանդ, համայնքի հետ մշտական կապ, դպրոցների, միութիւնների եւ եկեղեցու հետ համակարգւած աշխատանք։ Համայնքային սպասարկումների բարելաւումն ու որակի բարձրացումը, հաշւետւողականութիւնը եւ ժողովրդի մասնակցութեան ընդլայնումը պէտք է դառնան գործնական առաջնահերթութիւններ։ Միաժամանակ ազգային մարմինների միջեւ համագործակցութիւնն ու փոխվստահութիւնը ինքնանպատակ չեն. դրանք անհրաժեշտ պայմաններ են համազգային ներուժի համախմբման, առկայ խնդիրների լուծման եւ համայնքի կայուն զարգացման համար։ Նոր խորհրդի հեղինակութիւնը պիտի հաստատւի ոչ թէ յայտարարութիւններով, այլ տեսանելի արդիւնքներով եւ հանրային վստահութեամբ։