ԱԳ նախարար Աբբաս Արաղչին Բաղդադում հանդիպել է Իրաքի վարչապետ Ալի ալ-Զայդիի հետ՝ քննարկելով երկկողմ յարաբերութիւններն ու տարածաշրջանային զարգացումները։ «Tasnim»-ի համաձայն՝ Արաղչին շնորհակալութիւն յայտնելով Իրաքի կառավարութեանն ու ժողովրդին, Իսլամական համագործակցութեան կազմակերպութեան ԱԳ նախարարների խորհրդի 52-րդ նիստը հիւրընկալելու համար, կարեւորել է կազմակերպութեան հնարաւորութիւնների առաւել արդիւնաւէտ օգտագործումն իսլամական աշխարհի խնդիրների, յատկապէս Պաղեստինի հարցի եւ Իսրայէլի գործողութիւնների դէմ դիրքորոշումների քննարկման նպատակով։ Արաղչին շեշտել է Իրանի եւ Իրաքի յարաբերութիւնների հետագայ ամրապնդման Թեհրանի պատրաստակամութիւնը։ Անդրադառնալով տարածաշրջանային անվտանգութեանը նա պնդել է, որ Արեւմտեան Ասիայում անկայունութեան հիմնական պատճառը Իսրայէլի կողմից տարածքների զաւթումն ու աշխարհաքաղաքական նկարտումներն են: Արաղչիի խօսքով Իրանը ձգտել է դիւանագիտական միջոցներով կանխել լարւածութեան սրումը, մինչդեռ ԱՄՆ-ը բազմիցս խախտել է պայմանաւորւածութիւնները եւ ուժի կիրառմամբ ձախողել դիւանագիտական գործընթացները, նպաստելով նաեւ միջազգային առեւտրային նաւագնացութեան անվտանգութեան խաթարմանը։ Հանդիպման ընթացքում քննարկւել են նաեւ Սաուդական Արաբիայի եւ Եմէնի միջեւ հակամարտութիւնը, Եմէնի ծովային շրջափակման դադարեցմանն աջակցելու ուղիներն ու տարածաշրջանում լարւածութեան նւազեցման հնարաւորութիւնները։