Եգիպտոսի նախագահ Աբդել Ֆաթահ աս-Սիսին հայտարարել է, որ իր պաշտոնավարման ժամկետը կավարտվի 2030 թվականին, և սահմանադրությունը փոփոխելու միջոցով այն երկարաձգելու հարց չի քննարկվում։ «Սահմանադրությունն անփոփոխ թողնելը ճիշտ ճանապարհն է։ 2030 թվականին, եթե ողջ լինեմ, երկրում իմ պաշտոնավարման ժամկետը կավարտվի։ Այս հարցը լիովին կարգավորված է և այլևս քննարկման ենթակա չէ»,- ասել է աս-Սիսին Եգիպտոսի ռազմական ակադեմիայի շրջանավարտների ավարտական արարողության ժամանակ։ Նրա խոսքերը մեջբերում է Ahram Online-ը։ Աս-Սիսին առաջին անգամ նախագահ է ընտրվել 2014 թվականին, իսկ 2018-ին վերընտրվել է երկրորդ ժամկետով։ 2019 թվականի սահմանադրական հանրաքվեից հետո նրա լիազորությունների ժամկետը չորսից դարձել է վեց տարի, իսկ պաշտոնավարման ժամկետը երկարաձգվել է ևս երկու տարով։ Փոփոխություններով նրան նաև երրորդ անգամ ընտրվելու հնարավորություն է տրվել։ 2023 թվականի դեկտեմբերին աս-Սիսին կրկին ընտրվել է Եգիպտոսի նախագահ՝ արդեն վեց տարի ժամկետով։