Երևանում՝ Կոնսերվատորայի այգում, տեղի է ունեցել հանրային քննարկում Ամուլսարի հանքի շահագործման վերաբերյալ։ Ըստ նախաձեռնող՝ «Ամուլսարն առանց հանքի» շարժման՝ հանքի շահագործման հեռանկարը բազմաթիվ հարցեր է առաջացնում՝ կապված ջրային ռեսուրսների, կենսաբազմազանության, շրջակա միջավայրի և ազդակիր համայնքների ապագայի հետ։ Հաղորդագրության մեջ ասված է, որ հավաքի նպատակն է «համախմբվել, քննարկել առկա խնդիրները, լսել տարբեր մասնագիտական կարծիքներ և միասին հասկանալ՝ ինչ քայլեր են անհրաժեշտ հետագա անելիքները որոշելու համար»։ Իր ելույթում բնապահպան Լևոն Գալստյանը նշեց, որ առողջարանային քաղաքի 70-ամյա համբավ ունեցող Ջերմուկի կողքին ոսկու բաց հանք բացելը և ցիանիդով մշակելը չի կարող չի կարող համեմատվել մի հանքի հետ, որը բացվել է 1950 թվականին և գործում է արդեն 76 տարի․ «Մարդիկ հարցնում են՝ ինչո՞ւ Քաջարանի հանքի դեմ չեք պայքարում․․․ Հին հանքը ինչ, որ հնարավոր էր աղտոտել, ինչ, որ հնարավոր էր վերացնել, վերացրել է»։ Գալստյանը պնդեց, որ Ջերմուկում բնակիչների մեծ մասը դեմ են հանքի շահագործմանը․ «Ուղղակի 20 թվականի պատերազմը կոտրեց նաև իրենց մեջքը։ Մենք պետք է հիշենք սա»,- ասաց նա՝ հորդորելով համայնքի մարդկանց ուժ գտնել և պայքարել։ Իրավաբան Նազելի Վարդանյանն էլ ընդգծեց, որ հանքը գտնվում է սեյսմիկ բարձր ակտիվություն ունեցող, սողանքային տարածքում, առկա են ռադիոակտիվ նյութեր՝ ուրան, թորիում և այլն։ Իրավապաշտպան Մարիա Բարխուդարյանն առաջարկեց առաջիկա բողոքի ակցիան իրականացնել հոկտեմբերի 19-ին՝ COP17-ի առաջին աշխատանքային օրը։ Հոկտեմբերի 10-ին վարչապետ Նիկոլ Փաշինյանը հայտնեց Ամուլսարի հանքի շահագործման մեկնարկի մասին։ Հայաստանի քաղաքացիական հասարակության ներկայացուցիչները դատապարտել են հանքի բացումը՝ այն համարելով վտանգ երկրի բնապահպանական անվտանգության և միջազգային պարտավորությունների կատարման համար։ Նրանք հայտարարել են, որ հանքի շահագործումը՝ Երևանում կայանալիք ՄԱԿ-ի Կենսաբազմազանության մասին կոնվենցիայի կողմերի 17-րդ համաժողովին (COP17) ընդառաջ, հակասում է Հայաստանի հայտարարած բնապահպանական նպատակներին։ Հայտարարության հեղինակները պահանջում են անհապաղ դադարեցնել հանքի շահագործումը, իրականացնել շրջակա միջավայրի վրա ազդեցության նոր գնահատում և վերանայել ծրագրին տրամադրված պետական աջակցությունը։ Լուսանկարը՝ նախաձեռնության ֆեյսբուքյան էջից The post Երևանում տեղի ունեցավ հանրային քննարկում Ամուլսարի հանքի շահագործման վերաբերյալ appeared first on Infocom .