ԱԳ նախարար Աբբաս Արաղչին յայտարարել է, որ Թեհրանը վստահում է հայ գործընկերներին եւ համոզւած է, որ պաշտօնական Երեւանը քայլեր չի ձեռնարկի Իրանի անվտանգութեան դէմ։ Հոկտեմբերի 16-ին Երեւանում՝ COP17-ի առաջնորդների գագաթնաժողովի շրջանակում կայացած ճեպազրոյցի ընթացքում, Արաղչին անդրադարձել է «Թրամփի ուղու» (TRIPP) ծրագրի իրագործման վերաբերեալ Իրանի հնարաւոր մտահոգութիւններին։ «Մենք սերտ կապի մէջ ենք մեր հայ բարեկամների հետ, վստահում ենք նրանց եւ գիտենք, որ նրանք ոչինչ չեն անի Իրանի անվտանգութեան դէմ։ Մենք շարունակում ենք խորհրդակցութիւնները Հայաստանի իշխանութիւնների հետ»,- ասել է Իրանի արտաքին քաղաքական գերատեսչութեան ղեկավարը։ Անդրադառնալով Թեհրանում Հայաստանի արտաքին գործերի նախարար Արարատ Միրզոյեանի հետ վերջերս անցկացւած խորհրդակցութիւններին՝ Արաղչին դրանք արդիւնաւէտ է գնահատել։ Իրանի արտգործնախարարի յայտարարութիւնը հնչել է հայ-իրանական խորհրդակցութիւնների եւ տարածաշրջանային հաղորդակցութիւնների շուրջ քննարկումների շարունակման պայմաններում։