Վրաստանի ներքին գործերի նախարարության Կենտրոնական քրեական ոստիկանության դեպարտամենտի և ֆինանսների նախարարության Եկամուտների ծառայության մաքսային դեպարտամենտի աշխատակիցները կանխել են Վրաստան հրազենի խոշոր խմբաքանակի ապօրինի ներմուծման դեպք: ՆԳՆ-ի տեղեկություններով՝ իրավապահները սկաների միջոցով մանրամասն զննել են մեղադրյալի վարած ավտոմեքենան «Սարփի» անցակետի տարածքում։ Հատուկ կահավորված թաքստոցում հայտնաբերվել և որպես իրեղեն ապացույց առգրավվել են տարբեր մոդելների հրազենի ութ միավոր, ութ պահունակ և փամփուշտներ։ Հետաքննություն է ընթանում Վրաստանի քրեական օրենսգրքի 236-րդ հոդվածի 3-րդ, 4-րդ և 5-րդ մասերով, ինչպես նաև 214-րդ հոդվածի 4-րդ մասով։ Նշված հանցագործությունները նախատեսում են մինչև ութ տարի ժամկետով ազատազրկում։