Սննդի ազգային գործակալությունը հրապարակել է մանկապարտեզներում իրականացված մշտադիտարկման վերջնական արդյունքները և հայտարարել, որ վերցված սննդամթերքի նմուշներում խախտումներ չեն հայտնաբերվել։ Ստուգումն իրականացվել է երեխաների զանգվածային թունավորման դեպքից հետո։ «Հայտնի են դարձել կենդանական և ոչ կենդանական ծագման տարբեր տեսակի սննդամթերքի բոլոր 694 նմուշների լաբորատոր հետազոտության արդյունքները։ Դրանք ամբողջությամբ համապատասխանում են սննդամթերքի անվտանգության սահմանված նորմերին։ Թբիլիսիի մանկապարտեզների սաների շրջանում նորովիրուսով պայմանավորված գաստրոէնտերիտի դեպքերի կապակցությամբ Սննդի ազգային գործակալությունն անհապաղ սկսել է համալիր ուսումնասիրություն։ Գործակալության տեսչական խմբերը ստուգել են մանկապարտեզների սննդի բլոկները, ինչպես նաև մսամթերքի և կաթնամթերքի արտադրությամբ զբաղվող ձեռնարկությունները։ Քարտեր գնել Մշտադիտարկման շրջանակներում լաբորատոր ստուգման են ենթարկվել մանկապարտեզներից վերցված սննդամթերքի տարբեր տեսակներ, այդ թվում՝ բանջարեղեն և մրգեր, կաթնամթերք (պանիր, կաթի փոշի, գերբարձր ջերմաստիճանով մշակված խմելու կաթ, կարագ, թթվասեր), միս և մսամթերք (տավարի միս և թռչնամիս), հացահատիկային մթերքներ, պատրաստի ուտեստներ և խմելու ջուր։ Հետազոտությունն իրականացվել է հետևյալ ցուցանիշներով՝ ծանր մետաղներ, նիտրատներ, մանրէաբանական ցուցանիշներ և ախտածիններ (աերոբ միկրոօրգանիզմներ, աղիքային ցուպիկի խմբի բակտերիաներ / կոլիֆորմներ, սալմոնելա, շիգելա, կոագուլազադրական ստաֆիլոկոկ)», նշված է գերատեսչության հայտարարության մեջ։ Հիշեցնենք, որ սեպտեմբերի 18-ին հանրային մանկապարտեզների սաները ենթադրյալ թունավորման ախտանշաններով տեղափոխվել էին բժշկական հաստատություններ։ Նույն օրը Քննչական ծառայությունը հայտարարեց Թբիլիսիի 20 մանկապարտեզների 55 սաների և մեկ դաստիարակի թունավորման փաստով հետաքննություն սկսելու մասին՝ Վրաստանի քրեական օրենսգրքի 198-րդ հոդվածի երկրորդ մասով (մարդու կյանքի կամ առողջության համար վտանգավոր արտադրանքի արտադրություն կամ իրացում, որը վտանգ է ստեղծել կյանքի կամ առողջության համար)։ Ավելի ուշ հայտնի դարձավ, որ հոսպիտալացման կարիք է ունեցել ավելի քան 100 երեխա։ Սեպտեմբերի 20-ին Հիվանդությունների վերահսկման և հանրային առողջության ազգային կենտրոնը (NCDC) հայտարարություն տարածեց, համաձայն որի՝ լաբորատոր անալիզների արդյունքները վկայում են, որ «դեպքերի ճնշող մեծամասնության պատճառը, մեծ հավանականությամբ, նորովիրուսն է եղել»։ Նյութը՝ Sovanews