Վրաստանում Եվրամիության ներկայացուցչությունը հայտարարում է, որ 2026 թվականին 38 միլիոն եվրո կհատկացնի նոր ծրագրերի իրականացմանը՝ շարունակելու «իրական փոփոխություններ մտցնել Վրաստանի ողջ տարածքում ապրող ընտանիքների և տեղական համայնքների կյանքում»։ Հայտարարության մեջ ընդգծվում է, որ «Եվրամիության գործընկերությունը վրաց ժողովրդի հետ արդեն ավելի քան 30 տարվա պատմություն ունի»։ «Վրաստանում ժողովրդավարության հետընթացի պատճառով Եվրամիությունն այլևս ֆինանսական աջակցություն չի ցուցաբերում երկրի իշխանություններին։ Սակայն մենք շարունակում ենք օգնել Վրաստանի բնակչությանը», — ասվում է հայտարարության մեջ։ Ներկայացուցչության տեղեկություններով՝ նոր ծրագրերը նախատեսում են՝ փոքր քաղաքներում և ավաններում տնտեսական հնարավորությունների ստեղծում, քաղաքացիների՝ փոփոխվող աշխատաշուկայում պահանջված հմտությունների ուսուցում, գյուղաբնակ կանանց իրավունքների և հնարավորությունների ընդլայնում, ընտանեկան ֆերմերային տնտեսություններին աջակցություն՝ եկամուտներն ավելացնելու և սննդամթերքի որակը բարելավելու համար, կանանց և աղջիկների նկատմամբ բռնության մակարդակի նվազեցում, կլիմայի փոփոխությանը հարմարվողականություն և բնական աղետներին պատրաստվածության բարձրացում, Աբխազիայում բնակվող տեղական համայնքներին աջակցություն։ 1992 թվականից ի վեր Վրաստանի զարգացմանն աջակցելու նպատակով ԵՄ-ն ավելի քան 2 միլիարդ եվրո է ներդրել այնպիսի ոլորտներում, ինչպիսիք են գյուղատնտեսությունը, տարածաշրջանային ձեռնարկատիրության աջակցությունը, օդի որակի բարելավումը և, բազմաթիվ այլ ուղղությունների հետ մեկտեղ, Արևելք-Արևմուտք արագընթաց ավտոմայրուղու արդիականացումը։