ԵՐԵՎԱՆ, 16 հոկտեմբերի – Sputnik․ Ամենայն հայոց կաթողիկոս Գարեգին 2–րդն այսօր ընդունել է արցախցիների իրավունքների պաշտպանությամբ զբաղվող «Save Armenia» կազմակերպության պատվիրակությանը՝ կազմակերպության գործադիր տնօրեն դոկտոր Փոլ Մյուրեյի գլխավորությամբ։ Տեղեկությունը հայտնում է Մայր աթոռի տեղեկատվական համակարգը։Գարեգինը 2–րդը նաև կարևորել է կազմակերպության գործունեությունը՝ ի պաշտպանություն խղճի ու կրոնի ազատության և միջազգային հարթակներում ազգային հիմնախնդիրների բարձրաձայնման։Անդրադառնալով մշակութային ժառանգության արժևորմանն ուղղված նախաձեռնություններին՝ կաթողիկոսը գնահատել է «Save Armenia»-ի մասնակցությունը Անտոնիա Արսլանի «Մշո գիրքը» վեպի արևմտահայերեն թարգմանության շնորհանդեսի կազմակերպմանը։Ինչ վերաբերում է «Մշո ճառընտիրի» փրկության պատմությանը, ապա Գարեգին 2–րդը ընդգծել է, որ այն վկայում է ազգային, հոգևոր ու մշակութային ժառանգության պահպանման գործում հայ ժողովրդի աննկուն կամքի մասին, ինչն իր դրսևորումն է գտել նաև մեր օրերում։Դոկտոր Փոլ Մյուրեյն իր հերթին շնորհակալություն է հայտնել Ամենայն հայոց կաթողիկոսին ընդունելության համար և ներկայացրել կազմակերպության ընթացիկ աշխատանքները՝ հավաստիացնելով, որ «Save Armenia»-ն շարունակելու է իր զորակցությունը բերել հայ ժողովրդին ու Հայոց եկեղեցուն։