ԵՐԵՎԱՆ, 17 հոկտեմբերի – Sputnik․ Հայաստանի ֆուտբոլի ֆեդերացիայի նախագահի թեկնածու կարող է առաջադրվել նաև ՀՖՖ նախագահ Արմեն Մելիքբեկյանի խորհրդական, Հայաստանի ֆուտզալի հավաքականի գլխավոր մարզիչ Ռուբեն Նազարեթյանը։ Այս մասին գրում է «Հրապարակ» օրաթերթը։Հայտնի է, որ դեկտեմբերին տեղի է ունենալու Հայաստանի ֆուտբոլի ֆեդերացիայի ժողովը, որի ժամանակ ՀՖՖ նոր նախագահ և գործադիր կոմիտե են ընտրելու։ Ավելի վաղ թերթը գրել էր, որ իշխանությունը ֆեդերացիայի նախագահի պաշտոնում դիտարկում է Ֆրանսիայում Հայաստանի պատվավոր հյուպատոս Դենիս Ջորկաեֆի թեկնածությունը։Թեև ՀՖՖ նախագահ Արմեն Մելիքբեկյանը հայտարարել է, որ վերընտրվելու մտադրություններ չունի, բայց, ըստ պարբերականի, նա ՀՖՖ փոխնախագահ Արմեն Նիկողոսյանի հետ փորձելու է պահպանել ՀՖՖ-ի կառավարման լծակները Ռուբեն Նազարեթյանի միջոցով։«Հրապարակն» անձամբ Նազարեթյանին հարցրել է` հավակնո՞ւմ եք ՀՖՖ նախագահի պաշտոնին, նա ասել է․ «Այս պահին ասելիք չունեմ, երբ կունենամ, կարձագանքեմ»։Պարբերականն այդ թեմայով զրուցել է երկպագուների FAF ակումբի հիմնադիր Սերգեյ Ջանջոյանի հետ։«Մարդ, որը Մելիքբեկյանի ամբողջ գործունեությունը կիսել է, մարդ, որը ֆուտբոլի հետ ընդհանրապես կապ չունի, չպետք է ղեկավարի ՀՖՖ-ն։ Ոչ մի դեպքում չի կարելի գնալ արկածախնդրության և նրան առաջադրել, մենք միանշանակ դեմ ենք լինելու»,– ասել է Ջանջոյանը։Հիշեցնենք, որ բազմաթիվ ֆուտբոլային ակումբները դեմ են Արմեն Մելիքբեկյանի վերընտրվելուն։ Մելիքբեկյանն ինքն էլ հունիսին իր հարցազրույցում հայտարարել է, թե չի դիտարկում կրկին առաջադրվելու հարցը: Օրաթերթի տեղեկություններով՝ թեպետ լուրեր էին շրջանառվում, որ Մելիքբեկյանը մտափոխվել է, «փոշմանել» է, և հնարավոր է՝ առաջադրվի, սակայն իշխանությունն արդեն կողմնորոշվել է այս հարցում՝ ընտրություն անելով հօգուտ հայկական արմատներով ֆրանսիացու։