ԵՐԵՎԱՆ, 17 հոկտեմբերի – Sputnik. Ֆրանսիայի ազգային ոստիկանության փորձագետները ՆԳՆ ոստիկանության գվարդիայում անցկացրել են հասարակական կարգի պահպանության և հասարակական անվտանգության ապահովման մարտավարական կարողությունների զարգացման վերապատրաստման դասընթացներ։ Տեղեկությունը հայտնում է ՆԳՆ մամուլի ծառայությունը։ Սեպտեմբերի 22-ից հոկտեմբերի 9-ը անցկացված դասընթացի ընթցքում փորձագետները ներկայացրել են զանգվածային միջոցառումների ժամանակ Ֆրանսիայի ազգային ոստիկանության կողմից կիրառվող մարտավարական հնարքներն ու գործողությունների կազմակերպման առանձնահատկությունները։Վարժանքի սցենարը զարգացել է փուլային կերպով։ Սկզբում մոդելավորվել է խաղաղ հավաքի իրավիճակ, որի ընթացքում Ոստիկանության գվարդիայի ծառայողները ներկայացրել են օրինական պահանջներ։ Այնուհետև, ըստ սցենարի, հավաքի մասնակիցների մի մասը չի ենթարկվել օրինական պահանջներին, իրավիճակը աստիճանաբար սրվել է, իսկ ամբոխի վարքագիծը դարձել է անկառավարելի։Իրավիճակի փոփոխությանը համապատասխան՝ ծառայողները փուլային կերպով փոխել են գործողությունների մարտավարությունը՝ կիրառելով վերապատրաստման ընթացքում ձեռք բերած գիտելիքներն ու հմտությունները։ Ցուցադրվել են հատուկ միջոցների և ջրանետ մեքենայի կիրառման, ինչպես նաև զանգվածային անկարգությունների ակտիվ մասնակիցների ձերբակալման և մեկուսացման գործողություններ։ Վարժանքի ավարտին վերապատրաստման մասնակիցներին տրվել են հավաստագրեր։ՆԳՆ ոստիկանության գվարդիայի հրամանատարությունը ֆրանսիացի փորձագետներին հանձնել է շնորհակալագրեր։