Երևանում հուշարձան տեղադրելն այսօր ավելի հեշտ է, քան պետք է լիներ։ Sputnik Արմենիայի «Ուրիշ նորություններ» հաղորդաշարի շրջանակում այս հայտարարությունն արեց ուրբանիստ, Երևանի Կենտրոն վարչական շրջանի նախկին ղեկավար, Հայկական գորգի և ասեղնագործության ազգային կենտրոնի հիմնադիր Վիկտոր Մնացականյանը։Մնացականյանն անդրադարձավ Երևանի ինքնության մաս կազմող Մհեր Մկրտչյանի՝ հոկտեմբերի 10-ին տեղադրված արձանի շուրջ քննարկումներին։«Ֆրունզի խարիզման այդ արձանում չկա», - նշեց նա` հավելելով, որ հուշարձանը պետք է փոխանցի ոչ միայն մարդու արտաքին նմանությունը, այլև նրա անհատականությունն ու էությունը։Մնացականյանը շեշտեց` հանրային արվեստի գործերը պետք է անցնեն մասնագիտական գնահատում, իսկ դրանց տեղադրումը պետք է ներդաշնակ լինի տարածքի պատմությանն ու բնույթին։Խոսելով գորգանախշերով հետիոտնային անցումների մասին՝ Հայկական գորգի և ասեղնագործության ազգային կենտրոնի հիմնադիրը կարևորեց մասնագետների կարծիքը։ Նրա դիտարկմամբ՝ գորգային մոտիվները քաղաքային միջավայր տեղափոխելիս պետք է հաշվի առնել հայկական գորգագործության ավանդույթները, գունային առանձնահատկություններն ու խորհրդաբանությունը։Զրույցում անդրադարձ է արվում նաև Երևանի պատմական շենքերի պահպանությանը, Կոնդի ինքնությանը, հանրային տարածքների կազմակերպմանը և քաղաքաշինության համակարգային խնդիրներին։ Մնացականյանի կարծիքով՝ քաղաքի զարգացումը չի սահմանափակվում մայթերի ու խաղահրապարակների բարեկարգմամբ․ անհրաժեշտ է մասնագիտական պատասխանատվություն, ինչպես նաև հստակ չափանիշներ և Երևանի պատմական ու ճարտարապետական ժառանգության գիտակցում։Ինչպե՞ս պահպանել Երևանի ինքնությունը և միաժամանակ բաց լինել նոր արվեստի ու քաղաքային լուծումների համար։ Այս և այլ հարցերի պատասխանները` տեսանյութում։