Սպիտակ տան նոր մամուլի քարտուղար Քեյթի Զաքարիան իր առաջին ճեպազրույցի ընթացքում պատասխանել է ընդամենը երեք լրագրողի հարցերի։ Մամուլի հետ նրա շփումը տևել է ընդամենը մոտ 14 րոպե։ Ընդ որում՝ ներածական խոսքը տևել է գրեթե 8 ու կես րոպե, այսինքն՝ ԱՄՆ նախագահ Դոնալդ Թրամփի նոր մամուլի քարտուղարը հարցերին պատասխանել է ընդամենը մոտ 5 րոպե։ Մինչդեռ Սպիտակ տանը և Պետդեպարտամենտում անցկացվող կանոնավոր ճեպազրույցները նախկինում հաճախ տևել են շուրջ 45 րոպե կամ ավելի, ինչը սովորական երևույթ էր, ոչ թե բացառություն։ Զաքարիան ճեպազրույցի կարճ տևողությունը բացատրել է Թրամփի աշխատանքային գրաֆիկով և լրագրողների հետ նրա հնարավոր շփմամբ։ ԱՄՆ նախագահն այդ պահին Սպիտակ տան հարավային սիզամարգից ուղղաթիռով մեկնում էր Վաշինգտոնի մերձակայքում գտնվող Էնդրյուսի ռազմաբազա, որտեղից պետք է ուղևորվեր Ալյասկա։ Սակայն այդ մեկնումը չէր համընկնում նոր մամուլի քարտուղարի կանոնավոր ճեպազրույցի ժամի հետ։ Սպիտակ տան պաշտոնական ներկայացուցիչը շնորհակալություն է հայտնել իր նախորդին՝ Քերոլայն Լևիթին, ցուցաբերած օգնության համար։ «Այո՛, Քերոլայնն ինձ աներևակայելի աջակցություն է ցուցաբերել»,- նշել է Զաքարիան։