ՆԱՏՕ-ի միացյալ ուժերի գերագույն հրամանատար, ԱՄՆ գեներալ Ալեքսուս Գրինկևիչը հայտարարել է, որ դաշինքը պատրաստ է ռազմական գործողությունների անցնել, եթե ենթարկվի հարձակման։ Նրա խոսքով՝ ՆԱՏՕ-ն կկանխի թշնամու առաջխաղացումը և անհրաժեշտության դեպքում կկոտրի նրա ռազմական ուժերը։ Վարշավայի անվտանգության ֆորումում Գրինկևիչը ներկայացրել է դաշինքի պաշտպանական ռազմավարությունը՝ ընդգծելով, որ ՆԱՏՕ-ն պատերազմ չի փնտրում, սակայն խաղաղությունը պահպանելու համար պետք է պատրաստ լինի ռազմական դիմակայության։ Նա նաև կարևորել է անդամ երկրների համատեղ գործողություններն ու Ռուսաստանի հետ հաղորդակցության ուղիների պահպանումը։ Եվրոպական պաշտոնյաները զգուշացնում են, որ Ռուսաստանը կարող է փորձարկել ՆԱՏՕ-ի պաշտպանությունը՝ ավելացնելով դիվերսիաները կամ դիմելով սահմանափակ ռազմական ներխուժման։ Վերջին ամիսներին եվրոպական երկրներում գրանցվել են մի շարք կասկածելի միջադեպեր, այդ թվում՝ պաշտպանական ընկերության հրդեհ և օդանավակայանում ուկրաինական ինքնաթիռի դեմ ենթադրյալ հարձակման փորձեր։ Գրինկևիչի խոսքով՝ ՆԱՏՕ-ն կօգտագործի սենսորներ, ինքնավար համակարգեր և ռազմական ուժ՝ հնարավոր հարձակումները կանխելու համար։ Սակայն դաշինքի որոշ երկրներ դեռ դժվարություններ ունեն անօդաչու թռչող սարքերի հայտնաբերման և դրանց հակազդելու հարցում։ Դանիայի պաշտպանության հետախուզական ծառայությունը գնահատել է, որ Ռուսաստանը կարող է սահմանափակ ռազմական հարձակում իրականացնել ՆԱՏՕ-ի մեկ կամ մի քանի անդամ երկրների դեմ՝ փորձելով պառակտում առաջացնել դաշինքում և շեղել եվրոպական ռեսուրսները Ուկրաինային աջակցելուց։ Միաժամանակ, փորձագետները նշում են, որ քանի դեռ Ռուսաստանը պատերազմում է Ուկրաինայում, ՆԱՏՕ-ի վրա ուղղակի հարձակման հնարավորությունները սահմանափակ են։