ՀՀ ԱԺ «Քաղաքացիական պայմանագիր» խմբակցության նախաձեռնությամբ հոկտեմբերի 13-ին կազմակերպվել էր աշխատանքային քննարկում Ղարաբաղից տեղահանված մի խումբ քաղաքացիների մասնակցությամբ։ Հանդիպմանը մասնակցել են նաև «Քաղաքացիական պայմանագիր» խմբակցության պատգամավորներ, պատասխանատուներ և ներկայացուցիչներ ՀՀ պետական գրեթե բոլոր գերատեսչություններից։ ԱԺ աշխատանքի և բարեկեցության հարցերի մշտական հանձնաժողովի նախագահ Նազելի Բաղդասարյանը տեղեկացրել է, որ հանդիպման համար հիմք է դարձել Ղարաբաղից տեղահանված անձանց շահերը ներկայացնող «Վերածնվող Արցախ» ՀԿ նախագահ Անաստաս Իսրայելյանի նամակը՝ ուղղված «Քաղաքացիական պայմանագիր» խմբակցությանը։ Նազելի Բաղդասարյանը նշել է, որ մինչ այս երկու անգամ հանդիպել են Անաստաս Իսրայելյանի հետ։ Ներկայացված նամակում հակիրճ ձևակերպվել են այն հարցերն ու խնդիրները, որոնք մտահոգում են Ղարաբաղից տեղահանված անձանց։ «Լիահույս եմ, որ այս քննարկման ընթացքում պատասխանները կտրվեն»,- ասել է Նազելի Բաղդասարյանը։ Անաստաս Իսրայելյանը, ինչպես նաև հանդիպման մյուս մասնակիցները մանրամասն ներկայացրել են Ղարաբաղից տեղահանված անձանց մտահոգող խնդիրները, ըստ իրենց պատկերացումների՝ առաջարկել նաև դրանց լուծման ուղիները։ Բարձրաձայնված մտահոգությունները հիմնականում վերաբերում էին տեղահանվածների սոցիալական աջակցության, բնակարանային ապահովման հարցերին, մասնավորապես՝ անշարժ գույքի գնաճի պայմաններում հավաստագրերով բնակարան ձեռք բերելու դժվարություններին, ինչպես նաև նշված անձանց իրավական կարգավիճակին։ ՀՀ աշխատանքի և բարեկեցության նախարար Արսեն Թորոսյանը, գերատեսչությունների ներկայացուցիչները, օրենսդիրները պատասխանել են հանդիպման մասնակիցների հարցերին, անդրադարձել Կառավարության կողմից իրականացվող ծրագրերին, պատրաստակամություն հայտնել առաջիկայում քննարկել ներկայացված առաջարկներն ու դրանց լուծման ուղիները։