Երևանի քաղաքապետ Տիգրան Ավինյանը գործակարգավարական նիստի ժամանակ կարգադրեց տուգանել թեթև վթարից հետո 15 րոպեից ավելի ճանապարհը փակող վարորդներին։ Քաղաքապետի գնահատմամբ՝ խցանումների պատճառներից մեկն էլ մանր վթարներն են, երբ վարորդները մեքենաները չեն հեռացնում ճանապարհի երթևեկելի հատվածից՝ սպասելով ապահովագրական գործակալներին։ «Իրար «կռիլո» քսած երկու ավտո կարող են 2 կիլոմետրանոց խցանում առաջացնել։ Եթե երեք գծանի Մյասնիկյան պողոտայի երկու գիծը փակում են, միջին արագությունը 22-ից դառնում է 8 կմ/ժ։ Օրենքով հստակ սահմանված է՝ եթե վթարից հետո լուրջ հետևանքներ չկան, 15 րոպեից ավելի ճանապարհը փակ պահելու դեպքում վարորդները տուգանվելու են։ Պետք է լուսանկարեն տեղում և ազատեն երթևեկելի մասը»,- ընդգծեց քաղաքապետը։ Դիմելով ապահովագրական ընկերություններին՝ Ավինյանը շեշտեց, որ նրանք պետք է դուրս գան իրենց «կոմֆորտ զոնայից» և ներդնեն նորարարական մեթոդներ՝ վնասը հեռավար արձանագրելու համար։ «Մենք պետք է գիտակցենք, որ էդ 50,000 դրամանոց «կռիլոյի» պատճառով, որ ԱՊՊԱ-ն մտածում է՝ 50 պիտի տա, թե 43-ով կպրծնի, մի տասնյակ միլիոնավոր դրամների բոլորս ենք տուգանվում՝ խցանման մեջ կանգնած երևանցիները։ Հերի՛ք ա։ Մեր ճանապարհային երթևեկության անխափան շարժունակությունն ավելի կարևոր է, քան ապահովագրականների 50-60 հազար դրամի ռիսկը»,- ասաց Ավինյանը։ Քաղաքապետը հանձնարարեց առաջիկա երկու ամսում մշակել տեսախցիկներով ու տեղում հերթապահող տեսուչներով նման դեպքերն արձանագրելու մեխանիզմը․ հաշվել 15 րոպեն և սկսել տուգանել ճանապարհը չազատողներին։ Նաև նախատեսվում է ավելացնել քարշակների թիվը՝ երկրորդ շարքում կանգնած մեքենաները տարհանելու համար։ Ավինյանը հիշեցրեց, որ Երևանի ՏԻՄ օրենսդրական փոփոխությունների շրջանակում հստակ տուգանք է սահմանվել այն վարորդների համար, ովքեր առանց լուրջ հետևանքների թեթև վթարի դեպքում 15 րոպեից ավելի են զբաղեցնում ճանապարհը։ Քաղաքապետի խոսքով՝ վարորդները պետք է արագ լուսանկարեն պատահարի վայրը և ազատեն երթևեկելի մասը, որպեսզի կանխվեն կիլոմետրանոց խցանումները։ Մանրամասները՝ տեսանյութում։ Անի Թամրազյան