ԵՐԵՎԱՆ, 9 հոկտեմբերի – Sputnik. Ադրբեջանին սահմանակից Մեղրի համայնքի Կուրիս գյուղում երեք ենթադրյալ ադրբեջանցիների ներթափանցման լուրը ապատեղեկատվություն է։ Sputnik Արմենիային այս մասին հայտնեցին ՀՀ ազգային անվտանգության ծառայությունից։Նշենք, որ ըստ լուրերի` գիշերը Կուրիս գյուղում գյուղացիները տեսել են քաղաքացիական հագուստով 3 անձանց և ենթադրել, որ ադրբեջանցիներ են: Ըստ 24News-ի` գյուղում ու հարակից շրջաններում անմիջապես որոնողական աշխատանքներ են սկսվել:Հիշեցնենք` հոկտեմբերի 1-ին հայտնի դարձավ, որ Սյունիքի մարզի Սիսիան համայնքի Շաքի բնակավայր ադրբեջանցի զինծառայող է ներթափանցել, գիշերել տներից մեկում, ապա կրակել տուն մտած 39-ամյա Անի Ավետիսյանի ոտքին։ Վիրավոր կինը հասցրել է դանակով հարվածել ադրբեջանցուն՝ Նասիմի Մուսաևին։ Վնասվածքներ է ստացել նաև Ավետիսյանի երեք երեխաներից 15-ամյա որդին, որը տեղափոխվել է Սիսիանի ԲԿ։ Անի Ավետիսյանն այժմ Երևանի «Սուրբ Գրիգոր Լուսավորիչ» ԲԿ–ում է։Մուսաևի նկատմամբ քրեական հետապնդում է հարուցվել 5 հոդվածի հատկանիշներով, և երկամսյա կալանք է կիրառվել։