Ախալքալաքի մունիցիպալիտետի քաղաքապետարանը, պետական վճարովի ստաժավորման ծրագրին մասնակցելու համար, ընտրել է երկու երիտասարդ մասնագետի։ Ներկայացված 40 հայտերից հարցազրույցի փուլ է հասել չորս թեկնածու, արդյունքում, նրանցից երկուսը, Գնումների և Տնտեսության ծառայություններում, սկսել են եռամսյա վճարովի ստաժավորումը։ Գնումների ծառայությունում ստաժավորում է անցնում Ռուզաննա Խանոյանը, իսկ Տնտեսության ծառայությունում՝ Սյուզաննա Թորվանդյանը։ Ախալքալաքի մունիցիպալիտետի քաղաքապետարանի վարչակազմի ղեկավար Վաչագան Ծոռմուտյանի խոսքով, մյուս թեկնածուները չեն համապատասխանել սահմանված պահանջներին։ «Ստաժավորումը նախևառաջ երիտասարդների համար պետական հաստատության աշխատանքին ծանոթանալու հնարավորություն է, իսկ կազմակերպության համար՝ պոտենցիալ մասնագետների բացահայտելու հնարավորություն։ Կտեսնենք, թե նրանք ինչպես կդրսևորեն իրենց երեք ամիսների ընթացքում։ Մենք չենք կարող նրանց անմիջապես աշխատանքի ընդունել, քանի որ դրա համար համապատասխան ընթացակարգ է նախատեսված։ Բացի այդ, մունիցիպալիտետում պետք է համապատասխան թափուր հաստիք լինի»,– ասաց Վաչագան Ծորմուտյանը։ Քաղաքապետարանի տեղեկության համաձայն, ներկայումս Ախալքալաքի մունիցիպալիտետում տարբեր ծառայություններում առկա է հինգ թափուր հաստիք։ Դրանցից մեկը Գնումների ծառայությունում է, որտեղ այժմ ծրագրի մասնակիցներից մեկը ստաժավորում է անցնում։ Ստաժավորումը կտևի երեք ամիս՝ մինչև դեկտեմբերի վերջը։ ԾՆշենք, որ պետական վճարովի ստաժավորման ծրագիրը Վրաստանում իրականացվում է 2024 թվականից՝ վարչապետի նախաձեռնությամբ։ Ծրագրի հիմնական նպատակն է բուհերի վերջերս ավարտած շրջանավարտներին պետական հաստատություններում աշխատանքային գործնական փորձ ձեռք բերելու հնարավորություն տրամադրելը։ Իշխանությունները նաև նշում են, որ ծրագիրը նպատակ ունի երիտասարդ մասնագետներին ներգրավել պետական հատված։