Մահապատժի ենթարկվելոով՝ մահացու ներարկումների երկու չափաբաժին ստանալուց հետո ողջ մնացած 50-ամյա ամերիկուհի Քրիստա Փայքը գիտակցության է եկել և այժմ կարողանում է խոսել։ Նրա փաստաբանները հայտնել են, որ Փայքը շարունակում է մնալ հիվանդանոցում, իսկ նրա վիճակի վերաբերյալ կանխատեսումն առայժմ անորոշ է։ Մահապատժի իրականացման ընթացքում Փայքը ձեռքերի հատվածում այրվածքներ և ծանր վնասվածքներ է ստացել։ Նրա փաստաբանները գործը բնութագրում են որպես ԱՄՆ պատմության մեջ առաջին դեպքը, երբ մահապատժի դատապարտված կալանավորը ողջ է մնացել մահացու ներարկումից հետո։ Բժշկական փորձագետների կարծիքով՝ ձախողված մահապատիժը կարող էր պայմանավորված լինել երակային կաթետերների սխալ տեղադրմամբ։ Նրանց գնահատմամբ՝ պենտոբարբիտալը չի ​​ներարկվել անմիջապես երակի մեջ, այլ կուտակվել է շրջակա հյուսվածքներում։ «Ըստ երևույթին, մահապատիժն իրականացնող խմբի անդամներից ոչ ոք չի նկատել, որ ներերակային կաթետերները սխալ են տեղադրվել կամ որ երակները պատռվել են», — նշված է Փայքի փաստաբանների՝ դատարան ներկայացրած փաստաթղթում։ Պաշտպանական կողմի փաստաբանները պնդում են, որ բուժող բժիշկները նախապես զգուշացրել էին պաշտոնյաներին Փայքի՝ փխրուն երակների և արյան հետ կապված խնդիրների մասին։ Նրանց խոսքով՝ այդ զգուշացումներն անտեսվել են։ Փաստաբանները պահանջում են հետաքննել ձախողված մահապատժի հանգամանքները և պնդում են, որ մահապատիժը փոխարինվի ցմահ ազատազրկմամբ։ The post Կրկնակի ձախողված մահապատիժ. ողջ մնացած Քրիստա Փայքի համար փաստաբանները ցմահ բանտարկություն են պահանջում appeared first on Ազգ .