ՄԱԿ-ի Ընդհանուր ժողովի 81-րդ նստաշրջանի Երկրորդ եւ Հինգերորդ յանձնախումբերու ծիրէն ներս, ՄԱԿ-ի մօտ Հայաստանի Հանրապետութեան մշտական ներկայացուցիչ, դեսպան Պարոյր Յովհաննիսեան ընդգծած է Հայաստանի յանձնառութիւնը՝ կայուն զարգացման ֆինանսաւորման եւ ՄԱԿ-ի կողմէ իր յանձնառութիւններու արդիւնաւէտ գործադրութեան համար անհրաժեշտ միջոցներու ու կարողութիւններու ապահովման մէջ: Այս մասին կը հաղորդէ «Լուրեր»-ը։ Ներկայացուցչութենէն կը տեղեկացնեն, թէ 2-րդ յանձնախումբին մէջ Հայաստանի մշտական ներկայացուցիչը կարեւոր համարած է երկիրներու խոցելիութիւնները արտացոլող զարգացման ֆինանսաւորումը, Միջին հասոյթ ունեցող եւ Դէպի ծով ելք չունեցող զարգացող երկիրներուն աջակցութեան տրամադրումը, տարածաշրջանային հաղորդակցութիւններու խթանումը, ինչպէս նաեւ ներկայացուցած է Հայաստանի նախապատուութիւնները՝ իբրեւ COP17-ը հիւրընկալող եւ առաջիկայ նախագահող երկիր։ Հինգերորդ յանձնախումբին մէջ դեսպան Յովհաննիսեան վերահաստատած է Հայաստանի՝ ՄԱԿ-ի կանոնաւոր ելեւմտացոյցին իր անդամավճարները ամբողջութեամբ եւ ժամանակին վճարելու հետեւողական գործելակերպը, եւ ընդգծած՝ նախատեսելի ֆինանսաւորման, ինչպէս նաեւ թափանցիկ ու փաստերու վրայ հիմնուած բարեփոխումներու կարեւորութիւնը, որոնք պիտի ամրապնդեն ՄԱԿ-ի արդիւնաւէտութիւնն ու հաշուետուողականութիւնը։ The post ՊԱՐՈՅՐ ՅՈՎՀԱՆՆԻՍԵԱՆ ՄԱԿ-Ի ՄԷՋ ՆԵՐԿԱՅԱՑՈՒՑԱԾ Է ՀԱՅԱՍՏԱՆԻ ՆԱԽԱՊԱՏՈՒՈՒԹԻՒՆՆԵՐԸ՝ ԻԲՐԵՒ COP17-Ը ՀԻՒՐԸՆԿԱԼՈՂ ԵՐԿԻՐ appeared first on Գանձասար .