ԵՐԵՎԱՆ, 7 հոկտեմբերի – Sputnik․ Երևանյան ռեստորաններից մեկի մենեջերը գաղտնի նկարահանումներ է իրականացրել կանանց զուգարանում։ Այս մասին հրապարակում է արել հայկական ԶԼՄ-ներից մեկը, որին արձագանքել է նաև ՀՀ ԱԺ «Հայաստան» խմբակցության անդամ Քրիստինե Վարդանյանը՝ հրավիրելով պատկան մարմինների ուշադրությունը։ Վարդանյանի գրառմանն արձագանքել է ՆԳՆ մամուլի խոսնակ Նարեկ Սարգսյանը։ Նրա խոսքով՝ ՆԳՆ ոստիկանությունում նշված դեպքի վերաբերյալ առկա է տեղեկություն, որն այս պահին ստուգվում է։Հավելենք, որ Sputnik Արմենիայի խմբագրությունը ևս դեպքի վերաբերյալ նամակ է ստացել, ըստ որի՝ մի կին հայտնել է, որ ռեստորանի մենեջերը, ենթադրաբար, իր հեռախոսը տեղադրել է կանանց զուգարանի լվացարանի տակ և գաղտնի նկարահանել այցելուներին։ Ըստ նույն հրապարակման՝ երբ կինը հայտնաբերել է հեռախոսը և առերեսել մենեջերին, վերջինս հաստատել է, որ հեռախոսն իրենն է։ Ռեստորանը հրապարակային արձագանքում նշել է, որ տվյալ անձը մենեջերն էր և աշխատանքից ազատվել է։ Ռեստորանի անունը չենք հրապարակում՝ հաշվի առնելով անմեղության կանխավարկածը։