Ֆրանսիացի քաղաքական գործիչները պահանջել են ազատ արձակել հայ գերիներին

Երեւան: Մեդիամաքս: Ֆրանսիայի տարբեր քաղաքական ուժերի 25 ներկայացուցիչներ, այդ թվում՝ Նիցցայի, Լիոնի, Մարսելի, Ալֆորվիլի, Իսի լե Մուլինոյի եւ մի շարք այլ քաղաքների քաղաքապետեր և այլ պաշտոնյաներ կոչ են արել Ադրբեջանին անհապաղ և անվերապահորեն ազատ արձակել այնտեղ պահվող բոլոր հայ գերիներին։ Ֆրանսիական Ֆիգարո պարբերականում հրապարակված համատեղ հայտարարության մեջ նրանք նշել են, որ բազմաթիվ հայեր են ձերբակալվել 2023 թվականին Լեռնային Ղարաբաղից հայ բնակչության բռնի տեղահանման ընթացքում, իսկ նրանցից 20-ը Ադրբեջանում դատապարտվել են խիստ պատիժների, այդ թվում՝ ցմահ ազատազրկման։Քաղաքական գործիչները միացել են Եվրոպական խորհրդարանի, ԱՄՆ Ներկայացուցիչների պալատի արտաքին հարաբերությունների հանձնաժողովի, ինչպես նաև Ֆրանսիայի Սենատի և Ազգային ժողովի՝ գերիներին ազատ արձակելու պահանջներին։ Իրական խաղաղություն չի կարող լինել առանց արդարության, ազատության և արժանապատվության , - ընդգծել են հայտարարության հեղինակները։Գերիների խնդիրը սեպտեմբերի սկզբին կրկին հայտնվել էր Փարիզի ուշադրության կենտրոնում։ Քաղաքապետարանի հարակից տարածքում կազմակերպվել էր Ադրբեջանում պահվող 19 հայ գերիների դիմանկարների ցուցահանդես։ Սակայն ցուցահանդեսի բացմանը Փարիզի քաղաքապետարանի նախատեսված մասնակցությունը վերջին պահին չեղարկվել էր՝ Ադրբեջանի կողմից գործադրված ճնշումների ֆոնին։Հայ գերիների հարցով քայլեր են իրականացվում նաև Ֆրանսիայի այլ քաղաքներում։ Բուրգ-լե-Վալանսի քաղաքապետ Մարլեն Մուրիեն դիմել է Ադրբեջանի նախագահ Իլհամ Ալիևին՝ Ադրբեջանում գերի պահվող Լյուդվիգ Մկրտչյանին ազատ արձակելու խնդրանքով՝ նրա առողջական խնդիրները հաշվի առնելով։Էլլադա Ղուկասյան-Բարսեղյան(Ֆրանսիայում Մեդիամաքսի սեփական թղթակից)