«Երկրորդ շնչառություն»․ Երբ երգը ամոքում է․ «Օրրանի» 70+ տարեցների յուրահատուկ երգչախումբը04.10.2026

Երաժշտությունն ամոքում է կյանքի դժվարին իրավիճակում հայտնված տարեցների սրտերն ու հոգիները: «Օրրան» բարեգործական կազմակերպության տարեց շահառուների համար սկսած արտթերապիայի պարապմունքներից ամենաշատը սիրվել է հենց երաժշտաթերապիան, որի մասնակիցներից էլ ժամանակի ընթացքում ձևավորվել է տարեցների համանուն երգչախումբը: «Մեր երգչախմբում, որքան էլ զարմանալի է, հանդես է գալիս նաև հինգ տղամարդ, այնպես որ մենք ձայնային առումով լիարժեք խումբ ենք»,- ասում է խմբավար Սիլվա Կարապետյանը՝ ներկայացնելով այն խանդավառությունը, որ տիրում է հանդիպումների օրերին: Նրա պատմելով՝ մասնակիցներն այնքան են սիրում երգել, որ ամեն շաբաթ մուտքի մոտ հենց երգուպարով են դիմավորում իրեն: «Օրրանի» երգչախմբում ընդգրկված 14 անդամներից ամենաերիտասարդը 70-ն անց է, իսկ ավագը՝ 87 տարեկան: Տիկին Սիլվան իր մասնագիտական գործունեության ընթացքում բոլոր տարիքային խմբերի հետ աշխատել է, իսկ ավագների երգչախումբ ստեղծելու առաջարկը մասնագիտական առումով շատ հետաքրքրել է իրեն: «Օրրանում ոչ միայն ուղղակի 60-ն անց մարդիկ են, այլ շատ հաճախ նյութական ծանր պայմաններ, մեծ կորուստներ ունեցող տարեցներ, և ես հոգեկան մեծ բերկրանք եմ ապրում, երբ տեսնում եմ, որ ինքնամոռաց երգելու պահերին նրանք կտրվում են այդ իրականությունից»,- ասում է խմբավարը՝ տեղեկացնելով, որ բավականին առաջադեմ երգացանկ ունեն, և բեմում երգելուց զատ, իրենք նաև դիտարժան շոու են ապահովում: Տարեցներն այնքան են սիրում երգելը, որ, չնայած լեզուն չգիտեն, բայց հայտնի որոշ երգեր կատարում են նաև անգլերենով: