ԵՐԵՎԱՆ, 5 հոկտեմբերի - Sputnik. Ռուսաստանի Արտահանման կենտրոնը Երևանում ՌԴ Առևտրային ներկայացուցչության հարթակում սեմինար է կազմակերպել տեղի գյուղմթերք արտադրողների համար։«Հայաստանում Ռուսաստանի Դաշնության Առևտրային ներկայացուցչության հարթակում կայացել է մասնագիտացված սեմինար Հայաստանի ագրարային ոլորտի ներկայացուցիչների համար՝ նվիրված պարարտանյութերի կիրառման ժամանակակից մոտեցումներին և գյուղատնտեսական արտադրության արդյունավետության բարձրացմանը»,-ասված է առևտրային ներկայացուցչության Telegram-ալիքում հրապարակված հաղորդագրության մեջ։Նշվում է, որ միջոցառումը կազմակերպել է Ռուսաստանի Արտահանման կենտրոնը՝ Հայաստանում Ռուսաստանի Առևտրային ներկայացուցչության աջակցությամբ և Սանկտ Պետերբուրգի «Լինգո Գումատ» ընկերության հետ համատեղ, որը մասնագիտացած է պարարտանյութերի մշակման ու արտադրության, ինչպես նաև բուսաբուծության արդյունավետության բարձրացման լուծումների ոլորտում։Առևտրային ներկայացուցչությունում նշել են, որ նման միջոցառումների անցկացումը նպաստում է ռուսաստանցի արտադրողների և հայաստանյան ձեռնարկությունների միջև ուղիղ շփումների զարգացմանը, մասնագիտական փորձի փոխանակմանը և Հայաստանի շուկա ռուսական արտադրանքի մատակարարումների հնարավորությունների ընդլայնմանը։