ԵՐԵՎԱՆ, 5 հոկտեմբերի – Sputnik. ՀՀ Սյունիքի մարզի Սիսիան համայնքի Շաքի բնակավայրում ՀՀ սահմանը հատած ադրբեջանցի զինծառայողի կրակոցից տուժած Անի Ավետիսյանի հետվիրահատական վիճակը կայուն է։ Այս մասին Sputnik Արմենիային հայտնեցին ՀՀ առողջապահության նախարարությունից։Նշենք, որ կնոջ ոտքը վիրահատել են հոկտեմբերի 2-ին։ Տուժած կնոջ քույրը` Արփի Ավետիսյանը, Sputnik Արմենիային հայտնել էր, որ բժիշկները ոսկորի 2 բուռ փշրանք են հանել։Ի դեպ, ՀՀ մարդու իրավունքների պաշտպանի աշխատակազմի ներկայացուցիչները կրկին այցելել են Շաքիում ադրբեջանցի զինծառայողի կրակոցից տուժած կնոջը (նխորդ այց տեղի էր ունեցել հոկտեմբերի 3-ին)։ Պաշտպանի ներկայացուցիչները տեղում ծանոթացել են կնոջ բժշկական օգնության ու սպասարկման իրավունքի ապահովմանն առնչվող հարցերին:ՄԻՊ գրասենյակից հայտնում են, որ Անի Ավետիսյանի և նրա երեխաների իրավունքների և տվյալ դեպքի հետ կապված իրավունքներին վերաբերելի բոլոր հարցերը գտնվում են ՀՀ մարդու իրավունքների պաշտպանի անմիջական ուշադրության ներքո։Հիշեցնենք` հոկտեմբերի 1-ին հայտնի դարձավ, որ Սյունիքի մարզի Սիսիան համայնքի Շաքի բնակավայր ադրբեջանցի զինծառայող է ներթափանցել, գիշերել տներից մեկում, ապա կրակել տուն մտած 39-ամյա Անի Ավետիսյանի ոտքին։ Վիրավոր կինը հասցրել է դանակով հարվածել ադրբեջանցուն՝ Նասիմի Մուսաևին։ Վնասվածքներ է ստացել նաև Ավետիսյանի երեք երեխաներից 15-ամյա որդին, որը տեղափոխվել է Սիսիանի ԲԿ։ Անի Ավետիսյանն այժմ Երևանի «Սուրբ Գրիգոր Լուսավորիչ» ԲԿ–ում է։Մուսաևի նկատմամբ քրեական հետապնդում է հարուցվել 5 հոդվածի հատկանիշներով։ Նա կալանավորվել է 2 ամսով։