ԵՐԵՎԱՆ, 5 հոկտեմբերի – Sputnik․ Թբիլիսիի Ռուսթավելի պողոտայում շարունակվող վերականգնման աշխատանքների ընթացքում աշխատակիցները հայտնաբերել են պատմական նշանակություն ունեցող երեք քարե բեկորներ։ Այդ մասին ֆեյսբուքյան էջում հայտնում է հանրային գործիչ, Vector News-ի հիմնադիր Արթուր Միրզոյանը։Ըստ պատմական աղբյուրների՝ Կամոյանց Սուրբ Գևորգ եկեղեցին ներկայիս «Ազատության հրապարակ» մետրոյի կայարանի դիմաց էր։ Այն ավերվել է խորհրդային տարիներին՝ 1937–1938 թվականներին։ Դեռ 2026 թվականի ամռանը նույն վայրում արդեն իսկ հայտնաբերվել էին հին շինությունների տարրեր և այլ հնագիտական նյութեր։ Նույն հատվածում ընթացիկ աշխատանքների ժամանակ հայտնաբերվել են նաև մարդկային մնացորդներ և տապանաքարերի բեկորներ։ Միրզոյանի խոսքով՝ այս փուլում համապատասխան պետական և քաղաքային կառույցների հետ խորհրդակցություններ են ընթանում։ Նախնական պայմանավորվածության համաձայն՝ հայտնաբերված քարե բեկորները նախատեսվում է տեղափոխել Թբիլիսիի գործող հայկական եկեղեցիներից մեկի բակ։ Գտածոն առանձնահատուկ նշանակություն ունի նաև այն պատճառով, որ Ռուսթավելի պողոտայում ընթացող լայնածավալ վերականգնման աշխատանքներն ընդգրկում են քաղաքի պատմականորեն ամենահարուստ հատվածներից մեկը։ «Այս տարի առանձին հասարակական հետաքրքրություն առաջացրին նաև Ռուսթավելի պողոտայում գտնվող պատմական Մելիք-Ազարյանցի տան վերականգնման աշխատանքները։ Շենքի ստորգետնյա հատվածների բացահայտումը լայն արձագանք ստացավ սոցիալական ցանցերում և լրատվամիջոցներում՝ նոր հետաքրքրություն առաջացնելով հին Թբիլիսիի պատմական ժառանգության նկատմամբ»,- նշել է Միրզոյանը։Նրա խոսքով՝ սա ևս մեկ անգամ ցույց է տալիս, թե որքան հարուստ պատմական շերտեր են պահպանվել ժամանակակից Ռուսթավելի պողոտայի տակ։