Վրաստանի պատրիարքարանը ընդունել է Տիեզերական պատրիարքության պատվիրակությանը։ Այս մասին տեղեկատվություն է տարածում Պատրիարքարանի հասարակայնության հետ կապերի ծառայությունը․ « Համայն Վրաստանի Կաթողիկոս-Պատրիարքն ընդունել է Տիեզերական պատրիարքության պատվիրակությանը։ Սույն թվականի հոկտեմբերի 1-ին Տիեզերական պատրիարքության ներկայացուցիչ, Ավստրիայի միտրոպոլիտ և Հունգարիայի ու Կենտրոնական Եվրոպայի էկզարխ Արսենիոսը (Կարդամակիս) Պատրիարքական փոխանորդ (քորեպիսկոպոս) Մաքսիմոսի հետ այցելել է Վրաստանի պատրիարքարան։ Պատվիրակության անդամներին հյուրընկալել է Նորին Սրբություն և Երանություն, Համայն Վրաստանի Կաթողիկոս-Պատրիարք, Մցխեթա-Թբիլիսիի արքեպիսկոպոս և Բիճվինթայի ու Ցխում-Աբխազիայի միտրոպոլիտ Շիո III-ը։ Հանդիպմանը մասնակցում էին՝ Համայն Վրաստանի Կաթողիկոս-Պատրիարքի փոխանորդ, Ախալցիխեի և Տաո-Կլարջեթիի միտրոպոլիտ Թեոդորեն (Ճուաձե), Պատրիարքարանի արտաքին գործերի ծառայության ղեկավար, Զուգդիդիի և Ցաիշիի միտրոպոլիտ Գերասիմեն (Շարաշենիձե), Վրաց Ուղղափառ Եկեղեցու պրոտոպրեսվիտեր Գիորգի Զվիադաձեն, Պատրիարքարանի հասարակայնության հետ կապերի ծառայության ղեկավար, ավագ քահանա Անդրիա Ջաղմաիձեն և Պատրիարքարանի արտաքին գործերի ծառայության ղեկավարի տեղակալ, ավագ քահանա Արչիլ Խաչիձեն։ Կողմերը զրուցել են եկեղեցիների միջև հարաբերությունների և այն աջակցության մասին, որը միտրոպոլիտ Արսենիոսը ցուցաբերում է Ավստրիայի վրացական ծխական համայնքին, ինչի համար Վրաց Եկեղեցու առաջնորդն ու հանդիպման մասնակիցները նրան շնորհակալություն են հայտնել։ Հանդիպման ընթացքում հիշատակվել է նաև Համայն Վրաստանի Կաթողիկոս-Պատրիարք Իլիա II-ի գործունեությունը։ Հանդիպման ավարտին կողմերը փոխանակվել են նվերներով։ Հյուրերը շնորհակալություն են հայտնել Նորին Սրբությանը ջերմ ընդունելության համար։ Հատկանշական է, որ միտրոպոլիտ Արսենիոսի հետ Վրաստանում է գտնվում շուրջ 50 ուխտավոր, որոնք Համայն Վրաստանի Կաթողիկոս-Պատրիարքի օրհնությամբ ուխտագնացություն կատարեն մեր երկրի սրբավայրերում», — նշված է Պատրիարքարանի հայտարարության մեջ։