Վահագն Արսենյանը կրկին ուզում է համայնքապետ դառնալ․ նա ՔՊ թեկնածուն է Ջերմուկում

Հոկտեմբերի 25-ին կայանալիք Ջերմուկ համայնքի ավագանու ընտրություններում «Քաղաքացիական պայմանագիր» կուսակցության նախընտրական ցուցակը գլխավորելու է Վահագն Արսենյանը։ Այս մասին տեղեկացնում է կուսակցությունը։ Արսենյանը ներկայում զբաղեցնում է Վայոց ձորի մարզպետի պաշտոնը։ Նա «Ջերմուկ գրուպ» ընկերության հիմնադիր նախագահ, ՀՀԿ նախկին պատգամավոր Աշոտ Արսենյանի որդին է: Արսենյանը 2015-2021 թվականներին եղել է «Ջերմուկ Գրուպ» ՓԲԸ-ի գործադիր տնօրենը։ 2021 թվականի հոկտեմբերի 12-ին Նիկոլ Փաշինյանի որոշմամբ Արսենյանը նշանակվեց Ջերմուկ համայնքի ղեկավարի պաշտոնակատար։ Նույն թվականի դեկտեմբերին տեղի ունեցած ՏԻՄ ընտրություններում ՔՊ-ն առաջադրեց նրան համայնքապետի թեկնածու։ Նա շուրջ չորս տարի ղեկավարեց Ջերմուկ համայնքը։ 2025 թվականի հոկտեմբերի 9-ին կառավարության որոշմամբ Արսենյանը նշանակվեց Վայոց ձորի մարզպետ։ Ինչո՞ւ է Ջերմուկի համայնքապետի պաշտոնը մարզպետի պաշտոնով փոխարինած Արսենյանը կրկին հավակնում համայնքապետի պաշտոնին։ Թեմայի վերաբերյալ նրանից մեկնաբանություն ստանալ չհաջողվեց, նա զանգերն անպատասխան թողեց։ Նարեկ Կիրակոսյան