Իրանը միջնորդների միջոցով Միացյալ Նահանգներին է ներկայացրել յոթօրյա ծրագիր, որը նախատեսում է Հորմուզի նեղուցով բնականոն նավարկության վերականգնում և Թեհրանի ու Վաշինգտոնի միջև բանակցությունների վերսկսում։ Այս մասին հայտարարել է Իրանի արտաքին գործերի նախարար Աբբաս Արաղչին։ Արաղչին ՄԱԿ-ի կենտրոնակայանում կայացած մամուլի ասուլիսում նշել է, որ ծրագրի իրականացման ժամկետը կսկսվի Միացյալ Նահանգների համաձայնությունից հետո։ «Մենք միջնորդների միջոցով Միացյալ Նահանգներին ծրագիր ենք ներկայացրել, որի համաձայն՝ որոշակի պայմանների կատարման դեպքում Հորմուզի նեղուցը յոթ օրվա ավարտին կբացվի, իսկ բանակցությունները կվերսկսվեն։ Յոթօրյա ժամկետը կսկսվի այն պահից, երբ Միացյալ Նահանգներն ընդունի այս ծրագիրը»,- ասել է Արաղչին։ Նրա խոսքով՝ Վաշինգտոնից ակնկալվող գործողությունները հնարավոր է իրականացնել չորսից հինգ օրվա ընթացքում։