Վենեսուելայի ժամանակավոր նախագահ Դելսի Ռոդրիգեսը սեպտեմբերի 23-ին ՄԱԿ-ի Գլխավոր ասամբլեայում հայտարարել է, որ երկիրը «լիարժեք ժողովրդավարության» անցնելու նպատակով ընտրություններ կանցկացնի։ Այդուհանդերձ, նա քվեարկության հստակ ժամկետ չի նշել։ Այս մասին հայտնում է Reuters-ը։ «Ես ուզում եմ դա շատ հստակ հայտարարել այս Գլխավոր ասամբլեայում․ Վենեսուելայում ընտրություններ են լինելու», – ասել է Ռոդրիգեսը, որը իշխանության է եկել այն բանից հետո, երբ 2026 թվականի հունվարին ԱՄՆ ուժերը հատուկ գործողության ընթացքում ձերբակալել էին Վենեսուելայի նախագահ Նիկոլաս Մադուրոյին։ Ռոդրիգեսի խոսքով՝ կառավարությունը բանակցություններ է սկսել ընդդիմության հետ և երաշխավորելու է բոլոր քաղաքական ուժերի մասնակցությունը։ Նա հավելել է, որ ազգային հաստատությունները նախապատրաստվում են ընտրական գործընթացին։ «Վենեսուելան սկսել է ժողովրդավարական վերափոխման գործընթաց՝ իր վերածննդի համար։ Դրա նպատակն է կառուցել բոլորի համար ավելի ազատ, ավելի բարեկեցիկ և ինքն իր հետ ավելի հաշտ երկիր», – ասել է Ռոդրիգեսը։ Ռոդրիգեսը միջազգային հանրությանը կոչ է արել աջակցել Վենեսուելային՝ «անորոշության և հակամարտության փուլից դեպի լիարժեք ժողովրդավարության փուլ» անցնելու գործընթացում։ Վենեսուելայի և ԱՄՆ-ի իշխանությունները նախկինում ևս ընդգծել են ընտրությունների անցկացման անհրաժեշտությունը՝ առանց ընտրությունների հստակ ժամկետներ սահմանելու։ Ընդդիմությունը նման ընտրությունների անցկացման համար կարևոր պայման է համարում անկախ Գերագույն դատարանի և Ազգային ընտրական խորհրդի ձևավորումը։ Ռոդրիգեսը ՄԱԿ-ի Գլխավոր ասամբլեայի շրջանակում կարճ հանդիպում է ունեցել ԱՄՆ նախագահ Դոնալդ Թրամփի հետ և գովաբանել նրան Վենեսուելայի հետ երկխոսություն վերսկսելու համար։ ԱՄՆ պետքարտուղար Մարկո Ռուբիոյի խոսքով՝ Թրամփն ու Ռոդրիգեսը քննարկել են հարավամերիկյան երկրի՝ միլիարդավոր դոլարների հասնող պետական պարտքի հարցը։ Պետքարտուղարի խոսքով՝ Վաշինգտոնը հանդես է եկել քաղաքական փոփոխությունների օգտին։ Միացյալ Նահանգները հայտարարել է, որ նախքան ընտրությունների անցկացումը Վենեսուելան պետք է կայունանա և վերականգնվի տնտեսապես։