Վրաստանը միանում է Իրանի դեմ միջազգային պատժամիջոցներին և դադարեցնում ավիահաղորդակցությունը այդ երկրի հետ։ Ինչպես տեղեկանում է «Ինտերֆաքս» գործակալությունից, այդ մասին լրագրողներին հայտարարել է հանրապետության վարչապետ Իրակլի Կոբախիձեն։ «Վրաստանը միշտ հաշվի է առնում այս կամ այն երկրի նկատմամբ գործող պատժամիջոցների ռեժիմները։ Մենք նաև համապատասխան որոշում ենք կայացրել Իրանի նկատմամբ, և Էկոնոմիկայի նախարարությունն այդ առնչությամբ հայտարարություն է տարածել», – ասել է Կոբախիձեն։ Նա ընդգծել է, որ Վրաստանն Իրանի նկատմամբ որևէ երկկողմ պատժամիջոց չի սահմանում, քանի որ «դա սխալ և անհեթեթ կլիներ»։ «Մենք գործում ենք սահմանված միջազգային պատժամիջոցների ռեժիմին համապատասխան», – ասել է Կոբախիձեն։ Նրա խոսքով՝ նման մոտեցում է ցուցաբերվել նաև Ռուսաստանի նկատմամբ, երբ Վրաստանը երկկողմ պատժամիջոցներ չի սահմանել։ «Սա մեր ընդհանուր քաղաքականությունն է․ մենք հարևան երկրների նկատմամբ երկկողմ պատժամիջոցներ չենք սահմանում, սակայն հաշվի ենք առնում միջազգային պատժամիջոցների ռեժիմները», – ասել է Կոբախիձեն։ Ավելի վաղ Վրաստանի քաղաքացիական ավիացիան հայտնել էր, որ սեպտեմբերի 21-ից կդադարեցվեն ԱՄՆ-ի կողմից պատժամիջոցների տակ գտնվող իրանական ավիաընկերությունների չվերթները։ ԱՄՆ-ի կողմից իրանական 27 ավիափոխադրողների և ծառայություններ մատուցող 9 ընկերությունների նկատմամբ սահմանվել են պատժամիջոցներ։